الدولة العميقة في مصر سابقا وحاليا تتخلص من الرأس فتتفكك المنظومة

تامر شيرين شوقي يكتب

• dr-naga
• 5 يونيو، 2026
• حوارات ومقالات
• الدولة العميقة, صبري نخنوخ, مصر, نخنوخ

( البادي جارد مع شخص كصبري نخنوخ وكتلته العضلية الضخمة جدا )
هل انت على استعداد تتخانق معاه فى الشارع او فى محل او فى اي مكان؟؟
حتى لو معاك الحق حتتجنبه..
ليه؟
لأن النتيجة معروفة مسبقا..
مهما كنت قويا او شجاعا حتاكل علقة موت..

اهو صبري نخنوخ عنده بدل الواحد من دول ٢٠ و لا ٥٠..
بيتحركوا معاه ال٢٤ ساعة..

و مع كده لحظة القبض عليه مفيش عيل فيهم إستجرى يفتح بقه او يمد ايده او يعمل عنتر شايل سيفه..

ليه؟؟؟
لإن دى عظمة الدولة العميقة المصرية
اللى فاهمة قاعدة ذهبية لم تفشل ابدا::

شيل الراس…الباقي يفك فورا
و يضرب تعظيم سلام للراس الجديدة

اقبض على نخنوخ..
العيال دى لا تعرف كيف تتصرف..
تستسلم للأمر الواقع..
تضرب تعظيم سلام للى جاي بعد نخنوخ…

مش مصدقني؟؟؟
اتفضل شوية أمثلة تؤيد كلامي::

لما بدأت تظهر قنوات الدش المصرية المستقلة من ٢٠٠٠ و طالع
دريم(منه لله احمد بهجت و هالة سرحان)
و المحور و الحياة و شوية الهجص ده..
كانت كل قناة فى وادي..
و كل قناة بتبرطم زي ما هي عايزة..
و ممكن تخلق من الحبة قبة..
خصوصا ان القنوات دى اغلبها ظهر فى عصر ما بعد صفوت الشريف و فى ظل وزراء إعلام أضعف بكتير منه..

الدولة العميقة عملت ايه فى عهد الرئيس السيسي؟؟
اشترت الإعلام كله..
كل المحطات..
كل الجرائد..
كل اللى بيوصل للناس..
و عملت شركة اسمها المتحدة و ضمت كل القنوات دى ليها..
بتكسب بتخسر بتتسرق مش مهم..
المهم ان إعلام مصر بالكامل محطوط تحت جهة واحدة
راس واحدة..

حطوا لوجو مش عارف ايه على الشاشة
حاضر و نعم
اتكلموا فى مزايا ورق الشجر
حاضر و نعم
شيطنوا فلان و علان
حاضر و نعم

من سنتين كده الراس الكبيرة فى المتحدة خد الصابونة و قعد فى بيتهم…
سيادتك حسيت بحاجة؟؟؟
فرقت مع القنوات فى حاجة؟؟
اتغير اتجاه الإعلام فى حاجة؟؟

خالص و مطلقا..

ليه؟؟
لإن الدولة العميقة حولت الإعلام لهرم برأس..
شيل الراس..
الجسم يفك..
هات راس جديدة..
كله تعظيم سلام للرأس الجديدة

مثال كمان شغال حاليا قدامك..
الحركة المدنية الديموقراطية!!!
ده تجمع لشخصيات عامة و أحزاب من اجل تقديم صورة بديلة مدنية للدولة بشكلها الحالي..
الحركة دى فى يوم من الأيام كان رئيسها يحيى حسين عبد الهادى
و ما ادراك ما يحيى حسين عبد الهادى!!!
رجل بأمة..
وصل تأثير الحركة ايامها الى ان (حد) بعت بلطجية يعتدوا عليهم اثناء افطار رمضاني فى النادي السويسري..
تم القبض على يحيى حسين عبد الهادى و هو الآن فى السجن..

اختفت الرأس المؤثرة الحقيقية..
الآن الحركة فى انتظار اعلان وفاتها خلال اجتماعها القادم نتيجة بيان!!!!!

بيان بصيغة خاطئة جملة و تفصيلا يسقط حركة كاملة من حسابات السياسة المصرية و يزيد من انعزال احزاب هي منعزلة اصلا عن الشارع المصري..

الدولة العميقة يا سادة
اقوى سلاح فى يد اي نظام حكم فى تاريخ مصر..

الدولة العميقة موجودة من ايام مينا موحد القطرين من ٣٢٣٢ قبل الميلاد!!!
امال انت فاكر اقتراح عاصمة جديدة لا فى الإقليم الجنوبي المنتصر و لا فى الإقليم الشمالي المنهزم مين اقترحه؟
تغيير التاج؟ تغيير شعار الدولة؟
جيش موحد من الاقليمين؟؟
فى حد منتصر يرضى يخضع للدولة العميقة؟؟
مينا وافق…لذلك بعد ١٠٠٠ سنة كاملة(متخيل يعني ايه ١٠٠٠ سنة!!!) من محاولات توحيد القطرين..
مصر توحدت وللأبد فى عصر مينا..

الدولة العميقة المصرية غيرت الإله!!!!!
اه والله زي ما بأقول لك كده(استغفر الله العظيم) كان الإله اسمه آمون

جه اخناتون و قال للمصريين آمون ده مش على مزاجي!!!
من النهاردة إلهكم بقى آتون!!!!
فى سابقة لم تحدث فى اي حضارة أخرى..
غير المصريون الرب المعبود!!!!!!

لما الدولة العميقة وجدت ان هذا التغيير ليس فى صالحها قتلت اخناتون و ألغت(هاهاها) آتون و رجعت آمون!!!!

باشا::
الدولة العميقة عمرها من عمر مصر..
و اى نظام حكم موجود او حييجي لازم يتعاون معها..
يوسع صلاحيتها يقلل نفوذها يغير الاسماء
الدولة العميقة تعرف كيف تتعامل و تتكيف مع كل وضع سياسي و اجتماعي و اقتصادي..

ماهر اباظة و سليمان متولي وزيرا الكهرباء و النقل لمدة ٢٠ سنة متصلة!!!!!
اه والله زي ما بأقول لحضرتك كده..
من ٨٠ ل ٩٩
تظل انجازاتهم(الحقيقية) مرتبطة بمجالهم..الكهرباء و النقل(مترو الإنفاق و القطار التوربيني)
بس تأثيرهم السياسي؟؟ صفر..
ليه؟ مش رباية الدولة العميقة

تعال كده لكمال الشاذلي
صفوت الشريف
فتحى سرور؟؟
دول الدولة العميقة و اتفرج على تأثيرها اللى لغاية النهاردة انت عايش فيه!!!

عارف يا سيدي الفاضل؟؟
أنجح حكومة فى تاريخ حسني مبارك كان مين رئيسها؟؟
الدكتور عاطف صدقي..
استاذ اساتذة الدولة العميقة..

صورة لبوديجاردات نخنوخ تعرفك ان مصر دي مش بالسهولة و لا السذاجة اللى الناس متخيلاها..

طولت عليكم

صباحكم عميق..